Сақтандыру компаниясын дұрыс таңдаймыз

Бүгінде Қазақстанда 38 сақтандыру компаниясы жұмыс істейді және олардың әрқайсысы өзін ең үздік әрі сенімді деп сендіреді. Дәл сізге сай келетін сақтандырушыны қалай таңдауға болады? Біз дұрыс таңдау жасауға көмектесетін бірнеше кеңес береміз.

Арзан дегеніміз үздік деген сөз емес

Әдетте полис сатып алғанда бізді ең алдымен оның бағасы қызықтырады. Әрине, аз төлеп, бірдеңе бола қалса барынша көп алғымыз келеді. Бірақ сараң екі рет төлейтінін ұмытпау керек. Компания дәл клиенттердің ақшасынан резервтер қалыптастырады, өтемақылар солардан төленеді. Сондықтан тым арзан полис, түрлі бонустар мен жеңілдіктер ұсынатын сақтандыру ұйымы сақтандыру жағдайы туындаған кезде төлемдерді жүзеге асыра алмауы немесе оларды созбалауы әбден мүмкін.

Компанияның тарихы

Нарықты зерделеп, ойыншыларды салыстыра отырып, сіз анық көрініс аласыз және сақтандырушыны таңдауға саналы түрде келе аласыз. «Сканерлеуді» компанияның беделінен, оның жұмыс істеу мерзімінен, тұрақтылығынан, Ұлттық Банктің сайтында жарияланатын қаржылық көрсеткіштерінен бастауға кеңес береміз. Әрине, компанияны кім басқаратынын, яғни оның акционері кім екенін білу қажет. Іріктеудің маңызды факторларының бірі сақтандыру ұйымының нарықтағы жұмыс тәжірибесі болуы керек. Өйткені компания өз қызметтерін неғұрлым ұзақ көрсетсе, соғұрлым бәсекеге қабілетті болады, себебі әлсіз, дұрыс құрылмаған және сауатсыз басқарылатын компаниялар нарықта ұзақ тұра алмайды.

Сервисті бағалаймыз

Мәселенің сервистік жағы да кем маңызды емес. Компания клиенттерге қосымша қызметтер ұсынуы тиіс, мысалы, ЖКО болған жерге шығу, тәулік бойы қоңырау шалуға болатын сall center болуы және т.б. Сақтандыру компаниясымен шартқа қол қоя отырып, сақтандырушы ауырған, мүлік бүлінген немесе, айталық, сол жол-көлік оқиғасы болған жағдайда қандай тәуекелдерді өтейтінін нақты түсіну қажет. Пәтерге полис сатып алып, кейін көршіміз су басып кеткенде, жылжымайтын мүліктің тек өрттен ғана сақтандырылғанын білетін жағдайлар жиі кездеседі. Сонымен қатар компанияның бірнеше филиалы болуы керек. Олардың әртүрлі өңірлерде орналасқаны тіпті жақсы. Бұл, біріншіден, ұйым өз дамуын бір қалада ғана емес, бүкіл Қазақстан бойынша көздейтінін, екіншіден, филиалдық желі ашуға тек қаражаты жеткілікті сақтандырушының ғана мүмкіндігі бар екенін білдіреді.

«Ауызша насихат»

Сақтандыру — бұл, бәлкім, ойыншылары туралы достарыңыз бен таныстарыңыздың пікірлерін тыңдаудың артықтығы жоқ санаулы нарықтардың бірі. Сонымен қатар сақтандыру ұйымдарымен болған жеке тәжірибеңізді талдап, мамандармен кеңесіп, Интернеттегі форумдардағы ақпаратты оқу қажет.

Жағдайын талдаймыз

Ұлттық Банктің сайтында сақтандыру ұйымының заңнама талаптарын сақтайтыны немесе сақтамайтыны туралы мәліметтер бар. Егер компанияға бұрын ескертулер берілгені немесе, одан да жаманы, оның қызметі уақытша тоқтатылғаны көрсетілсе, мұндай сақтандырушыға баруға кеңес бермейміз. Сондай-ақ төлемдердің мөлшеріне және сыйлықақылардың түсуіне (бұл біз, клиенттер, полис үшін төлейтін ақша) назар аудару керек. Сақтандыру сыйлықақыларының мөлшері неғұрлым жоғары болса, соғұрлым жақсы, өйткені бұл компанияның өз жұмысына жеткілікті түрде байыпты қарайтынын көрсетеді. Төлемдердің мөлшері сақтандыру ұйымының өз міндеттемелері бойынша қаншалықты адал жауап беретінін, яғни зардап шеккендерге полистер бойынша ақшаны өтейтінін көрсетуі мүмкін.

Шартты қайда жасасуға болады?

Сақтандыру шартын компанияның өз кеңсесінде немесе сақтандыру агентінен жасасуға болады. Полисті дәл кеңседен сатып алуға кеңес береміз: онда сізге шарттың талаптарын егжей-тегжейлі түсіндіріп, қызметпен айналысу құқығына лицензияны және сізді қызықтыратын басқа да құжаттарды көрсете алады. Ал сақтандыру агенті, әдетте, сізге өзіне көбірек төлейтін сақтандыру ұйымын таңуға тырысады. Бүгінде барлық компаниялар бірдей мөлшерлеме төлеуге тиіс болса да, агенттер тарапынан алаяқтық фактілері жоққа шығарылмайды.

Таңдауда қателессеңіз

Адал емес компания төлемді созуы, азырақ төлеу мақсатында залалды әлдеқайда төмен бағалауы мүмкін. Мұның бәрі сізден жүйке мен уақытты талап етеді. Мұндай жағдайда тегін тәуелсіз төрешіге — сақтандыру омбудсманына немесе шағыммен тікелей Ұлттық Банкке жүгінуге болады.