Экологиялық тәуекелдерді міндетті сақтандыру

Көптеген өнеркәсіптік кәсіпорындардың қызметі қоршаған ортаға орны толмас залал келтіруі, экологиялық жағдайды бұзуы және адамдардың денсаулығына елеулі зиян келтіруі мүмкін. Азаматтардың қолайлы қоршаған табиғи ортаға құқықтары Қазақстан Республикасының Азаматтық кодексінде бекітілген, оларды бұзу мемлекет пен жәбірленушілер алдында жауапкершілікке әкеп соғады.

Экологиялық сақтандыру кәсіпорныңызды қорғайды: экологиялық қауіпті қызмет түрлерін жүзеге асыратын кәсіпорын қоршаған ортаның авариялық ластануы нәтижесінде үшінші тұлғалардың өміріне, денсаулығына, мүлкіне және (немесе) қоршаған ортаға зиян келтірген жағдайда.

Объектідегі үшінші тұлғалардың өміріне, денсаулығына, мүлкіне және (немесе) қоршаған ортаға зиян келтіруге әкеп соққан авария фактісі сақтандыру жағдайы деп танылады.

Сақтандыру төлемі қоршаған ортаның авариялық ластануы нәтижесінде үшінші тұлғалардың өміріне, денсаулығына, мүлкіне және (немесе) қоршаған ортаға келтірілген нақты залал мөлшерінде жүзеге асырылады. Жәбірленушінің өміріне, денсаулығына және (немесе) мүлкіне келтірілген зиян үшін сақтандыру төлемі әлеуметтік қамсыздандыру немесе басқа сақтандыру шарттары бойынша тиесілі сомаларға қарамастан жүзеге асырылады.

Сақтандыру сомасы (шарт бойынша сақтандыру жауапкершілігінің лимиті) тараптардың келісімі бойынша белгіленеді, бірақ мынадан кем болмауы тиіс:

• дара кәсіпкер болып табылатын жеке тұлғалар үшін – 5 000 АЕК-тен;
• заңды тұлғалар үшін – 65 000 АЕК-тен;
• егер сақтандыру шарты тек қоршаған ортаға зиян келтіргені үшін жауапкершілікті сақтандыру бөлігінде жасалса – 17 000 АЕК-тен.

Сақтандыру тарифі (шарт бойынша сақтандыру сомасынан есептеледі):

• дара кәсіпкерлер мен заңды тұлғалар үшін – 0,76%-дан 2,65%-ға дейін;
• егер сақтандыру шарты тек қоршаған ортаға зиян келтіргені үшін жауапкершілікті сақтандыру бөлігінде жасалса – 0,59%-дан 2,05%-ға дейін.

Экологиялық тәуекелдерді міндетті сақтандыру Қазақстан Республикасының Азаматтық кодексіне сәйкес және Қазақстан Республикасының 13.12.2005 ж. № 93-III «Міндетті экологиялық сақтандыру туралы» Заңы негізінде жүзеге асырылады.